Оқудан нақты шешімге дейін: жасанды интеллект Алматы қаласының Жобалық офисінің жұмысын қалай жетілдіріп жатыр

Жасанды интеллект технологияларын енгізу және цифрлық құзыреттерді дамыту мемлекеттік басқаруды жаңғыртудың маңызды бағыттарының біріне айналып отыр. Бұл Мемлекет басшысының жасанды интеллектті күнделікті жұмыс үдерістеріне енгізу жөніндегі тапсырмасына толық сәйкес келеді. Мұндай технологиялар қайталанатын операцияларды автоматтандырып, басқарушылық шешімдердің сапасын арттыруға, ақпаратты өңдеу уақытын қысқартуға және мемлекеттік органдар қызметінің ашықтығы мен тиімділігін күшейтуге мүмкіндік береді.

Осы бағытта Алматы қаласының Жобалық офисінің «Қауіпсіз қала» базалық бағытын іске асыру тобы Almaty HUB ұйымдастырған Vibe Coding Bootcamp практикалық бағдарламасына қатысты. Бағдарлама бағдарламалау тәжірибесі жоқ мамандарға да заманауи жасанды интеллект құралдарының көмегімен жұмыс істейтін цифрлық өнім әзірлеуге мүмкіндік береді.

Оқу барысында қатысушылар генеративті жасанды интеллект көмегімен бағдарламалық код құруды, оны талдауды және қателерді анықтауды меңгерді. Бұл ретте тапсырманы қою, нәтижені бағалау және қабылданатын шешімдер үшін жауапкершілік толықтай маманның өзінде қалады.

Жобалық қызметке арналған ІІ-көмекші

Оқу бағдарламасының қорытындысы ретінде Алматы қаласының Жобалық офисіндегі негізгі бизнес-процестердің бірін автоматтандыруға арналған пилоттық ІІ-көмекші әзірленді.

Қазіргі уақытта қалалық жобаларды іске асыру барысында жүздеген ұйымнан мыңдаған құжат келіп түседі. Олар қолмен тексеріліп, толықтығы бағаланады, жүйеленеді, мәртебелері енгізіліп, ескертулер дайындалады. Мұндай көлемдегі жұмыс айтарлықтай еңбек ресурстарын талап етіп, адами фактордың ықтималдығын арттырады.

Әзірленген шешім – пайдаланушыларға құжаттарды автоматты түрде жүктеуге, олардың толықтығын тексеруге, өңдеу мәртебесін бақылауға және ескертулерді жедел алуға мүмкіндік беретін омниканалды веб-платформа.

Жүйе құжаттардың мазмұнын талдап, жетіспейтін материалдарды және типтік сәйкессіздіктерді анықтап, жобаның орындалу барысы туралы нақты уақыт режимінде толық ақпарат қалыптастырады.

Жасанды интеллект маманды алмастырмайды

Жоба авторларының айтуынша, жасанды интеллект маманды алмастыру үшін емес, оның жұмысын жеңілдету үшін әзірленген.

Қайталанатын процестерді автоматтандыру жоба менеджерлеріне құжаттардың мазмұнын сараптамалық тұрғыдан бағалауға, орындаушыларға әдістемелік қолдау көрсетуге, тәуекелдерді талдауға және басқарушылық шешімдер әзірлеуге көбірек уақыт бөлуге мүмкіндік береді.

Бірнеше аптаның ішінде әзірленген прототип 13 мыңнан астам бағдарламалық код жолынан тұрады және қазірдің өзінде мемлекеттік ұйымдардың нақты жұмыс процестеріне енгізіле бастады. Жүйе құжаттардың мазмұнын талдап, жетіспейтін ақпаратты анықтап, қызметкерлерге ұсынымдар қалыптастырады. Бұрын бірнеше сағат немесе күн талап еткен жұмыстар енді санаулы минутта орындалады.

Келесі кезең – ауқымды енгізу

Алдағы уақытта осындай жасанды интеллект құралдарын Алматы қаласының Жобалық офисіндегі басқа да бизнес-процестерге енгізу жоспарланып отыр. Атап айтқанда, тапсырмалардың орындалуын бақылау, жобалық көрсеткіштерді мониторингтеу, талдамалық материалдарды дайындау, орындаушылармен өзара іс-қимылды жетілдіру және басқа да әкімшілік процестерді автоматтандыру көзделген.

Жасанды интеллектті пайдалану мемлекеттік басқарудың цифрлық трансформациясының маңызды құрамдас бөлігіне айналып, мемлекеттік қызметтердің тиімділігін, ашықтығын және нәтижелілігін арттыруға ықпал етеді.