Алматы қаласының әкімі Бақытжан Сағынтаев Наурызбай ауданына жұмыс сапары кезінде сумен жабдықтау және су бұру желілерінің құрылыс нысандарында болды.
Өзінің Instagram-дағы парақшасында Б. Сағынтаев Наурызбай ауданындағы инженерлік және автокөлік инфрақұрылымының ауқымды дамуы ерекше бақылауда екенін атап өтті.
«Таяу жылдары орталық сумен қамтамасыз етуді 100%-ке дейін жеткізу міндеті тұр. Бүгінде ол бар болғаны 30%-ті құрайды. Жұмыс сапары кезінде сумен жабдықтау және су бұру желілерінің құрылысын тексердім. Тастыбұлақ ықшамауданындағы жұмыс жыл соңына дейін аяқталады. Келесі жылы Ақжар, Құрамыс, Таужолы, Қарғалы, Жайлау, Шұғыла ықшамаудандарында желілер мен «Қарғалы» су дайындау стансасын салуды жоспарлап отырмыз», — деп жазды Б. Сағынтаев.
Оның айтуынша, Абай даңғылын Момышұлы көшесінен қала шекарасына дейін ұзарту жұмыстары жүргізілуде. Учаскенің жалпы ұзындығы — 5,3 км. Әшімов көшесінің қиылысында жолайрық салынуда.
Алматы әкімі Б. Сағынтаев Жер қатынастары басқармасына құрылыс аймағына кіретін жер учаскелерін сатып алу мәселелерін тездетіп шешуді тапсырды.
«Батыс бағыттағы трафикті жеңілдету үшін жобаны келесі жылы аяқтау міндеті тұр», — деп атап өтті шаһар әкімі.
Сондай-ақ келесі жылы Қонаев көшесін қайта жаңартуды (Жандосов көшесінің жалғасы) Яссауи көшесінен Рысқұлов көшесіндегі Таусамалы кентіне дейін аяқтау жоспарлануда. Ұзындығы 1,2 км болатын жол 4 жолақты боп кеңейтіліп, тротуарлар мен арық желісі салынады. Ауданда қазір 57 көшедегі 48 шақырым жолға асфальт төселді. 147 көшеге ағымдағы жөндеу жұмыстары жүргізілді. 34 көшеде жаңа тротуар мен 18,7 км арық желісі салынды.
Ақпарат көзі: Алматы қаласы әкімдігінің қоғаммен байланыс қызметі
