«Алматы қаласын дамыту орталығы» АҚ-да «Шеврон» компаниясының Қазақстандағы әлеуметтік инвестициялар бағдарламаларының үйлестірушісі Лейла Айтмұхановамен жұмыс кездесуі өтті.
Кездесу барысында тараптар әлеуметтік инвестициялар мен корпоративтік жауапкершілік аясындағы ықтимал ынтымақтастық бағыттарын талқылады. Атап айтқанда, адами капиталды дамытуға, тұрақты қалалық бастамаларды қолдауға және әлеуметтік саланы ілгерілетуге бағытталған бірлескен іс-шаралар мен білім беру бағдарламаларын жүзеге асыру мүмкіндіктері қарастырылды.
Лейла Айтмұханова «Шеврон» компаниясының әлеуметтік инвестициялары жергілікті қауымдастықтардың ұзақ мерзімді дамуына, білім беру мен кәсіби әлеуетті арттыруға, сондай-ақ бизнестің қоғамдық үдерістерге белсенді қатысуына бағытталғанын атап өтті. Компания өз қызметінде жауапты корпоративтік азамат болуға ұмтылады, бұл халықтың өмір сапасын арттыруға және серіктестік ортаны кеңейтуге ықпал етеді.
Өз кезегінде Қаланың даму орталығының өкілдері мекеменің негізгі қызмет бағыттарын таныстырып, қоғамдық маңызы бар бастамаларды қолдау, азаматтық белсенділікті арттыру және бизнес, қалалық институттар мен қоғам арасындағы өзара іс-қимылды нығайту жөніндегі жұмыстар туралы ақпарат берді.
Сондай-ақ болашақ бірлескен іс-шаралардың форматтары — сараптамалық дөңгелек үстелдер, қоғамдық акциялар, білім беру платформалары мен тәжірибе алмасу бағдарламалары — жеке талқыланды.
Кездесу қорытындысы бойынша тараптар серіктестікті одан әрі дамытуға өзара мүдделілік білдіріп, Алматы қаласының орнықты дамуы мен әлеуметтік капиталын нығайтуға бағытталған бастамаларды бірлесіп пысықтау жөнінде уағдаласты.
«Алматы қаласын дамыту орталығы» АҚ қала игілігі мен тұрғындардың өмір сапасын арттыру мақсатында әлеуметтік жауапты бизнеспен серіктестікті жүйелі түрде кеңейту жұмысын жалғастырады.
