Құжат тараптардың білім беру, ғылым, зерттеу және жастар саясатын дамыту бағытында күш біріктіруге, сондай-ақ академиялық ортаның мемлекеттік, корпоративтік және қоғамдық құрылымдармен орнықты байланысын қалыптастыруға деген ниетін бекітеді. Келісімнің өзегінде – заманауи мегаполистің өзекті сын-қатерлеріне жауап бере алатын, тәжірибеге бағдарланған мамандар даярлау моделін қалыптастыру міндеті тұр.
Алматы қаласының орнықты әлеуметтік-экономикалық дамуына білім беру, зерттеу, инновациялық және әлеуметтік жобаларды қолдау арқылы ықпал ету – Орталықтың басты миссиясы. Осы тұрғыда басқарушылық кадрларды даярлаудың жетекші білім беру алаңымен әріптестік орнату аталған миссияның заңды жалғасы болып табылады. Тараптар академиялық және ғылыми әлеуетті дамыту, жастарды, жас ғалымдар мен студенттерді қолдау, сондай-ақ инклюзивті әрі әлеуметтік жауапты қоғам қалыптастырудың маңыздылығын атап өтті.
Ынтымақтастық «Әлеуметтік жұмыс», «Әлеуметтану», «Психология», «Педагогика», «Инклюзивті білім беру» және өзге де сабақтас бағыттар бойынша бакалавриат, магистратура және докторантура деңгейлеріндегі білім беру бағдарламаларын қамтиды. Сонымен қатар бірлескен ғылыми және қолданбалы зерттеулер жүргізу, дәрістер мен шеберлік сабақтарын, форумдар мен конференцияларды, хакатондарды ұйымдастыру, әдістемелік және талдамалық материалдар алмасу, студенттерді қалалық әлеуметтік бастамалар аясындағы волонтерлік және жобалық қызметке тарту көзделіп отыр.
Тараптар жастар бастамаларын, студенттік стартаптар мен әлеуметтік жобаларды қолдауға, сондай-ақ инклюзивті білім беру саласындағы сарапшыларды қоса алғанда, бейінді мамандарды тартуға айрықша назар аудармақ. Нақты жобалар сараптамалық кездесулер, қосымша материалдар алмасу және қажет болған жағдайда жеке келісімдер жасау арқылы айқындалады.
Меморандумға қол қою – қаланың дамуына қатысты міндеттерді шешу үшін зияткерлік, кадрлық және институционалдық әлеуетті жүйелі түрде біріктіруге деген ортақ ұмтылыстың көрінісі. Қалалық трансформация қарқынды жүріп жатқан кезеңде ғылым, білім және тәжірибе синергиясы орнықты, инклюзивті әрі әлеуметтік бағдарланған қалалық ортаны қалыптастырудың негізгі факторы болып табылады.
