Енді несие сомасы пәтер құнына негізделетін болады және тұрғын үйдің 1 шаршы метрінің бағасынан қалыптасады.
Өңірлік коммуникациялар қызметінің алаңында жеңілдетілген ипотекалық несиелеуге арналған брифинг өтті. Алматы қаласы »Отбасы банкі» АҚ филиалының директоры Данагүл Түсіпова биыл елімізде 5 000-ға жуық отбасына несие берудің жоспарланып отырғанын айтты.
Ол »Бақытты отбасы» бағдарламасы бойынша қатысушылардың тізімі қалыптасқанын еске салды. Іріктеудің негізгі критерийлері жергілікті әкімдікте кезекке қою күні және қойылым санаты болды. Бағдарламаның барлық қатысушылары өз мәртебесін otbasybank.kz. порталындағы жеке кабинеттерінен біледі.
«Қазақстандық отбасыларды жеңілдетілген шарттармен несиелендіруге биыл республикалық бюджеттен 51 млрд теңге бөлінді. Аталмыш қаражат Отбасы банкіне түсті. Бұл қаражат аясында 5000 жуық отбасы несиелендірілетін болады«, - деді Д.Түсіпова.
ҚР Үкіметінің 2022 жылғы 23 қыркүйектегі қаулысымен бекітілген Тұрғын үй-коммуналдық инфрақұрылымды дамытудың 2026 жылға дейінгі тұжырымдамасына сәйкес Бағдарлама шарттарына бірқатар оң өзгерістер енгізілді.
Енді «Бақытты отбасы» бағдарламасына көпбалалы отбасылар мен мүмкіндігі шектеулі балаларды тәрбиелеп отырған отбасылармен қатар, «жетім балалар мен ата-ана қамқорлығынсыз қалған балалар» сондай-ақ «I және II топтағы мүгедектер» санаттары бойынша тұрғын үй кезегінде тұрған қазақстанлықтар қатыса алады. Жаңа қосылған санаттар бойынша «Бақытты отбасы» бағдарламасына қатысушалар өз өтініштерін жаңа байқау жарияланған уақытта жолдай алады.
«Тағы бір жағымды жаңалық – «Бақытты отбасы» бағдарламасында табысқа шектеу қойылмайды. Бұған дейін отбасы мүшелерінің соңғы алты айдағы табысы ең төменгі күнкөріс деңгейінің 3,1 еселенген мөлшерінен, яғни 115 905 теңгеден аспауы керек деген талап бар болатын. Мысалы, көпбалалы отбасы отағасының жалақысы белгіленген нормадан 200 теңгеге асып кетсе, бұл отбасы қолжетімді несиеге қол жеткізе алмайтын«, - деп түсіндірді Д.Түсіпова.
Сондай-ақ, «Бақытты отбасы» бағдарламасы қатысушыларды несиенің максималды сомасымен шектемейтін болады. Осыған дейін аймаққа байланысты ол 10 миллионнан 15 миллион теңгеге дейін ғана болатын. Енді несие сомасы пәтер құнына негізделетін болады және тұрғын үйдің 1 шаршы метрінің бағасынан қалыптасады.
Қабылданған Тұжырымдамаға сәйкес таза әрлеудегі тұрғын үйдің 1 ш.м. үшін келесідей баға параметрлері белгіленген:
- Астана, Алматы қалаларында және олардың маңайындағы аудандарда 290 мың теңгеге дейін;
- Атырау және Маңғыстау облыстарында 240 мың теңгеге дейін;
- Шымкент қаласында, Қостанай, Түркістан, Қарағанды және Ұлытау облыстарында 220 мың теңгеге дейін;
- Шығыс Қазақстан, Батыс Қазақстан, Қызылорда және Абай облыстарында 200 мың теңгеге дейін;
- Ақтөбе, Ақмола, Алматы, Павлодар, Солтүстік Қазақстан, Жамбыл және Жетісу облыстарында 180 мың теңгеге дейін.
Әлеуметтік тұрғын үй 3-4 жайлылық класына сәйкес келетін және пәтердің ең үлкен ауданы 80 шаршы метрден аспайтын болады.
Жылжымайтын мүлік қарыз алушы тұрғын үй кезегінде тұрған аймақтан сатып алынуы тиіс.
«Тағы бір маңызды ақпарат, енді «Бақытты отбасы» бағдарламасы бойынша жергілікті әкімдіктер арқылы салынған әлеуметтік несиелік тұрғын үйлерді ғана сатып алуға болады«, - деп нақтылады РСК спикері.
Оны otbasybank.kz порталынан таңдауға болады. Тұрғын үйді таңдауға немесе өңірде үйдің қолданысқа берілуін күтуге (егер өтініш берген уақытта порталда сатып алуға шығарылған баспана болмаса) бағдарлама қатысушысына 2023 жылдың ақпан айының соңына дейін уақыт беріледі. Осы уақытқа дейін қатысушының өтініші сақталады.
«Бақытты отбасы» бағдарламасы бойынша пайыздық мөлшерлеме өзгеріссіз, жылдық 2% мөлшерінде қалады, ең төменгі бастапқы жарна – 10%. Несиенің максималды мерзімі – 20 жылға дейін. Несие алу үшін бағдарламаға қатысушылар төлем қабілеттілігін растаулары қажет.
Айта кетейік, »Бақытты отбасы» бағдарламасы жүзеге асырылған үш жыл ішінде 14 700 қазақстандық отбасы қоныс тойын тойлады.
Тұжырымдамаға сәйкес елімізде жеңілдетілген несиелік тұрғын үй бағдарламалары «2-10-20» («Бақытты отбасы» бағдарламасы) және «5-10-20» («Шаңырақ» бағдарламасы) аясында жүзеге асырылатын болады.
«5-10-20» бағдарламасы бойынша жергілікті әкімдіктерде баспана кезегінде тұрған азаматтардың барлық санаттары пәтер ала алады. Табыс бойынша шектеулер болмайды. Бастысы бағдарламаға қатысушылар төлем қабілеттілігін растаулары қажет. Бағдарлама бойынша жергілікті әкімдіктер арқылы салынған әлеуметтік несиелік тұрғын үйлерді ғана сатып алуға болады.
Дереккөз: Almaty.tv.
