Мемлекет басшысы Қасым-Жомарт Тоқаевтың тапсырмасына сәйкес 2025 жылға қарай алты жасқа дейінгі балаларды мектепке дейінгі тәрбиемен және оқумен қамту 100%-ті құрауы тиіс. Осы көрсеткішке қол жеткізу үшін Алматы қаласында кешенді шаралар жүзеге асырылып жатыр. Бұл туралы Өңірлік коммуникациялар қызметі алаңында өткен онлайн-брифинг барысында Алматы қаласы Білім басқармасы басшысының орынбасары Айсұлу Ботаева мәлім етті.
Кезең-кезеңмен жүргізіліп жатқан жүйелі шаралардың арқасында мектепке дейінгі мекемелердегі орын тапшылығы мәселесі шешіліп жатыр. Мысалы, 2020 жылы Алатау, Алмалы, Түрксіб және Бостандық аудандарында 670 орынға шақталған төрт мемлекеттік мектепке дейінгі ұйым ашылды. Сондай-ақ мемлекеттік балабақшаларды қайтару бойынша шаралар қарастырылған. Қазіргі уақытта Әуезов ауданындағы «Сказка» балабақшасының ғимараты жалға беруден қайтарылды. 2021 жылы 320 орынға есептелген он төрт топтан тұратын мемлекеттік балабақша ашу жоспарланған.
«Алматы қаласында балабақша кезегін азайту үшін соңғы 3 жылда 1950 орынға арналып 10 мемлекеттік балабақша салынды. Жекеменшік мектепке дейінгі мекемелерді ашу үшін барлық жағдай жасалуда және соңғы 3 жылда 9368 орынға арналған 380 жекеменшік мектепке дейінгі ұйым ашылды», — деп атап өтті Айсұлу Ботаева.
Алматыда 2021-2025 жылдар аралығында 15 мемлекеттік және 324 жекеменшік балабақшаның құрылысы жоспарланған.
Бүгінгі күні Алматыда 65 080 бала контингентін қамтитын 824 мектепке дейінгі ұйым жұмыс істейді, оның ішінде: мемлекеттік балабақшалар – 189, жекеменшік балабақшалар – 399, шағын орталықтар – 236. 2020 жылы бір жастан алты жасқа дейінгі балаларды мектепке дейінгі тәрбиемен және оқытумен қамту 63,5%-ті, бұл ретте үш жастан алты жасқа дейінгі балаларды қамту 89,4%-ті құрайды. Сонымен қатар мемлекеттік жекешелік серіктестік аясында қалада 1751 орынға шақталған 31 жекеменшік мектепке дейінгі ұйым жұмыс істейді. Мемлекеттік білім беру тапсырысы 397 жекеменшік балабақшада 20 441 орынға орналастырылған.
Атап өтетін жайт, мемлекеттік балабақшаға жолдама алу үшін balabaqsha.open-almaty.kz электронды жүйесі қолданылады.
Сонымен қатар 2020 жылдан бастап мектепке дейінгі шипажайлық және түзету ұйымдарына жолдама беру мен кезекке қою процесі автоматтандырылды, тәрбиеленушілердің келуінің электрондық табелі жүргізіледі, бұл мемлекеттік білім беру тапсырысын жүзеге асыру кезінде заң бұзушылықтардың алдын алады. 2021 жылға қарай электрондық мәзір, сондай-ақ балалардың ептілігі мен дағдыларына мониторинг жүргізудің автоматтандырылған жүйесін әзірлеу жоспарланған.
