Мемлекеттік балабақша басшыларының қатысуымен өткен кеңесте балабақшалардағы орын тапшылығын азайту, балаларды тамақтандырудың және денсаулық жағдайларын медициналық бақылаудың сапасын арттыру, мектепке дейінгі білім беру әрі тәрбиелеу үдерістерін, әкімшілік тарапынан менеджементті жақсарту, жемқорлық тәуекелдеріне қарсы іс-қимыл жүргізу мәселелері қаралды.
Бүгінгі күні Алматыда 824 мектепке дейінгі ұйым бар, оның 189-ы мемлекеттік, оған 65 мыңнан аса бала қатысады. 3 жастан 6 жасқа дейінгі балаларды қамту шамамен 90% құрайды.
Балабақшаларда орын тапшылығын азайту мақсатында 640 орынды төрт мемлекеттік балабақшаның құрылысы жүріп жатыр. Сонымен бірге жергілікті бюджет қаржысы есебінен жеке балабақшалардағы ата-аналар төлемін ішінара өтеу тетіктері пысықталуда. Бұл қосымша 5 мың орын құруға мүмкіндік береді. Тағы 2,2 мың орынды қолданыстағы нысандарды қайтару немесе жаңарту арқылы ашу жоспарлануда.
Кеңесте балабақша басшыларының жауапкершілігін күшейтуге ерекше назар аудару керектігі сөз болды. Әсіресе қаржы тәртібін сақтау өте маңызды, өйткені мектепке дейінгі білім беру саласына бөлінетін қаржы көлемі өсті. Сонымен бірге балабақша меңгерушілері білім беру процесінің жоғары мазмұндық сапасын қамтамасыз етіп, қосымша сабақтар өткізуді енгізулері тиіс.
Күн тәртібіндегі өзекті мәселенің бірі – балалар тағамының сапасын арттыру және қауіпсіздік шараларын күшейту. Бақылауды күшейту үшін бейнебақылау жүйесі кеңінен енгізіліп, «соқыр аймақтар» жабылуда.
Коронавирустық пандемия жағдайында санитарлық-эпидемиологиялық қауіпсіздік нормаларын сақтауға ерекше назар аударылады. Санитарлық дәрігерлер санитарлық қауіпсіздік ережелерінің белгіленген тәртібінің сақталуын анықтау үшін тұрақты мониторинг жүргізеді.
Алматы әкімі Бақытжан Сағынтаев қаржылық тәртіпке бақылауды күшейтуді және менеджментті күшейту бойынша шаралар қабылдауды тапсырды. Бұдан былай балабақша меңгерушілерінің жұмысы іске асырылған KPI арқылы бағаланатын болады. Бұдан өзге қамқоршылық кеңестердің құрамы қайта қаралады, олардың құрамында белсенді өмірлік ұстанымдары бар ата-аналар болулары тиіс.
Ақпарат көзі: Алматы қаласы әкімдігінің қоғаммен байланыс қызметі
