Сайран Сайфеденов Өңірлік коммуникациялар қызметінің баспасөз конференциясында Алматының Әуезов ауданында мектептер мен балабақшалардағы орын тапшылығы мәселесінің қалай шешіліп жатқанын айтты.
Аудан әкімі жаңа корпустардың аудандағы қолданыстағы мектептердің жүктемесін төмендетуге көмектесетінін хабарлады. Мектептер бірнеше жыл қатарынан кеңейіп келеді.
С. Сайфеденовтің айтуынша, Әуезов ауданындағы 33 мемлекеттік мектепте 49 мыңнан астам оқушы, 10 жекеменшік мектепте 1700-ден астам оқушы бар.
Оқушы орындарының ең үлкен тапшылығы 2019 жылы болды – 6 299 орын. Алайда, Мамыр шағын ауданындағы №202 мектептің (1200 орынға) және Ақсай шағын ауданындағы №123 мектептің жаңа корпустарының (400 орынға) пайдалануға берілуі арқасында азайды. Сондықтан, өткен жылы 4 699 орын тапшы болды.
«Жаңа оқу жылында орын жетіспеушілігін болдырмау үшін 3600 оқушыға арналған №6, 117, 121, 132, 133 мектептердің жаңа ғимараттарының құрылысын қыркүйекке дейін аяқтау жоспарлануда. Біз сондай-ақ 400 орынды екі жеке мектеп ашуды жоспарлап отырмыз. 2021 жылдың соңында пайдалануға берілгеннен кейін тапшылық 1099 орынды құрайды», - деді С. Сайфеденов.
Ауданда мектепке дейінгі мекемелерде орын тапшылығы мәселесі белсенді түрде шешілуде. Бүгінде Әуезов ауданында 147 балабақша мен шағын орталықтар жұмыс істейді – 16 509 бала. Бұл ретте тапшылық 10 799 орынға тең.
«Біз жаңа балабақшалар салу арқылы бұл тапшылықты азайту үшін белсенді шаралар қолданамыз. Биыл 662 орынды 9 жеке балабақша ашылды», - деді С. Сайфеденов.
№23 және №186 балабақшаларда күрделі жөндеу аяқталды. Сондай-ақ «Алтын бесік» шағын ауданында 120 орынды балабақша құрылысының жобалық-сметалық құжаттары әзірленуде. Қазіргі уақытта Жайлы қалалық орта басқармасы арқылы балабақша құрылысын жобалау жұмыстары жүргізілуде.
Ақпарат көзі: Алматы қаласы әкімдігінің қоғаммен байланыс қызметі
