Қала әкімі Б. Сағынтаев жүк көліктерінің зиянды қалдықтарын азайту жөніндегі қосымша шаралар туралы хабарлады.
Алматы әкімі Facebook-тегі парақшасында қоршаған ортаға түсетін техногендік жүктемені азайту жөніндегі жұмыстар туралы айтты.
«Қоршаған ортаға техногенді жүктемені азайту жұмыстарын жалғастырудамыз. Қоғамдық және коммуналдық автопарктерді экологиялық таза отынға ауыстыру жұмысымен қатар транзиттік жүк көліктерінің қозғалысын шектеу мүмкіндігін де зерделейміз. Жүргізілген мониторинг қалаға тәулігіне 17 мыңнан астам жүк көлігі кіретінін көрсетті», — деп жазды мегаполис әкімі.
Б. Сағынтаевтың айтуынша, бұл мәселені жан-жақты зерделеу үшін Полиция департаменті мен Жасыл экономика басқармасының қызметкерлері, сарапшылар қауымдастығы, сондай-ақ көлік пен коммуникация ҒЗИ мамандары тартылды. Қазіргі уақытта ластаушы қалдықтың көлемі, маршрутты әзірлеу мен өткізу қабілетін есептеу бойынша зерттеу жүргізілуде. Нәтижесінде мегаполистің экологиясы жақсарады.
Бұған дейін Алматы әкімі қалалық қоғамдық көлік паркі экологиялық таза отынмен жүретін 41 автобусқа жаңарғанын хабарлаған еді.
Ақпарат көзі: Алматы қаласы әкімдігінің қоғаммен байланыс қызметі
