Қорғаудың модераторы әрі сарапшыларының бірі — Алматы қаласын дамыту орталығының бас менеджері, курс авторы және оқытушысы Эльмира Карманова болды. Сонымен қатар қазылар алқасының құрамына Алматы қаласын дамыту орталығының қызметкерлері мен қоғамдық сектор өкілдері кірді.
Студенттер мектептегі буллингтің алдын алу, бастауыш сынып ата-аналарын қолдау, студенттердің бейімделуі, Peace Education бағытын дамыту, зейнеткерлерді қоғамдық өмірге тарту, ұрпақтар арасындағы байланысты нығайту және қала тұрғындарының өмір сапасына тікелей әсер ететін өзге де өзекті әлеуметтік тақырыптар бойынша жобаларын таныстырды.
Курстың басты ерекшелігі — студенттердің тек теориямен шектелмей, семестр бойы нақты мәселелерді зерттеп, мақсатты аудиториямен жұмыс жүргізіп, бастамаларын шынайы ортада сынақтан өткізуі болды. Олар кері байланыс жинап, нәтижелер мен шектеулерді және басқарушылық қорытындыларды талдады.
Қорғау барысында қатысушылар өз идеяларын ғана емес, сонымен қатар талдау жасау, жобалық ойлау, көпшілік алдында дәлелді сөйлеу және қаланың нақты әлеуметтік сұраныстарымен жұмыс істеу дағдыларын көрсетті.
Іс-шараға аға буын өкілдері де қатысып, студенттер өз бастамаларының практикалық маңыздылығы жөнінде шынайы әрі тікелей пікір алды.
Жобаның келесі кезеңі — Алматы қаласындағы жастар комьюнити-орталықтарында курсты өткізу. Болашақта бастаманы қаланың барлық аудандарына кеңейту жоспарланып отыр. Бұл тұрғындардың әлеуметтік мәселелерді шешуге қатысу мәдениетін қалыптастыруға, өз ауласынан бастап аудан мен мегаполис деңгейіне дейін ортақ жауапкершілік пен белсенділікті арттыруға мүмкіндік береді.
Осындай практикалық форматтар арқылы Алматыда жауапкершілікке, белсенділікке және бірлескен дамуға негізделген жаңа қалалық мәдениет қалыптасады.
