Елімізде осындай диагноз қойылған 108 науқас бар.
Қазақстанда алғаш рет синдактилияны емдейтін бірегей ота жасалды. Бұл синдром «біріккен саусақ» деген мағынаны білдіреді. Алматыда отандық мамандар Ресейлік әріптестерімен бірге қос бүлдіршіннің патологиясын жоюға көмектеспек.
Бұл – Света Балтабаеваның төртінші баласы. Дәрігерлер ұлына сирек кездесетін тұқым қуалайтын «көбелек синдромы» деген диагноз қойған. Алғашында 12 мүшесі сау баланың бір айдан кейін денесінде бөртпе пайда болады. Ол ашық жараға айналып, бір жылдан соң саусағы бір-біріне жабыса бастаған. 6 жылдан бері көпбалалы ана баласының өмірі үшін күресіп келеді. Өйткені терісі тым нәзік, оған күтім қажет.
«Терісі бөртіп, саусақтары жабысып қалды, сосын тырнағы түсті. Бала қазір 6 жаста. Жағдайы өте ауыр десем де болады. Біз күнделікті 2 рет жақпа жағамыз. Дәрігерлер жақсы қарайды, ақылын айтады. Отаның сәтті өтуін тілеп отырмын», – деді көпбалалы ана Света Балтабаева.
«Генетикалық өзгерістен баланың денесі бөртіп кетеді. Олар жарылып, жараға айналады. Жара көбейіп, саусағы бір-біріне қосылады. Олар қолымен әрекет жасай алмайды. Біз жасаған отаның мақсаты – балалардың жабысқан аяқ-қолын ашу», – деді ҚР ДСМ «Ақсай» республикалық клиникалық балалар ауруханасы РМҚК балалар ортопедиясы бөлімінің меңгерушісі Исамдун Харамов.
Жалпы елімізде осындай диагноз қойылған 108 науқас тіркелген. Олардың арасында 18 жасқа толмаған 63 бала бар. Дәрігерлердің айтуынша, жағдайы қиын бесеуіне міндетті түрде ота жасау қажет. Осы уақытқа дейін Ақсай балалар ауруханасының ортопедтері бір баланы Ресейге апарып, операция жасатып қайтқан.
Бүгін кемінде 2,5 сағатқа созылатын күрделі отаны отандық дәрігерлер де жасай бастайды. Көрші елден Алматыға 2 хирург-ортопед және анестезиолог-реаниматолог маманы көмекке келген. Өйткені ауыр отаны жасауда біліктілік аса маңызды. Дәрігерлер саусақты толық ашу үшін бір ғана ота көмектеспейтінін атап өтті. Қос бүлдіршінге 6 айдан соң тағы ота жасалады.
«Аяғы шалынып құлап қалған балаларды тұрғыза саламыз ғой. Ал бұл генетикалық ауруға шалдыққан бүлдіршіндерді қаттырақ ұстауға болмайды. Өйткені терісі сыпырылып түсіп қалады. Ал одан соң олардың денесі қатты ауырады, қансырайды. Осындай науқастарды отаға аларда жүйелі түрде дайындаламыз. Алдымен баланың аузына демалатын түтікше орналастырамыз. Өйткені ерін терісі зақымданғандықтан олар аузын аша алмайды. Тағы бір күрделі тұсы, саусақ бөлінген кезде тігу үшін өз денесінің таза бөлігінен тері аламыз. Оны да кесіп алу қиындық тудырады», – деді Пирогов атындағы жоғары медициналық технологиялар клиникасының бөлім меңгерушісі Владимир Заварухин (Ресей).
Ресейлік мамандарды шақыртуға көбелек ауруына шалдыққан балаларды қолдайтын қоғамдық қордың көмегі тиген. Балалар үшін ота тегін жасалды. Айта кетейік, Дүниежүзілік денсаулық сақтау ұйымының мәліметінше, әлем халқының шамамен 7 пайызы сирек кездесетін генетикалық ауруға шалдыққан.
Дереккөз: Almaty.tv.
