Алматыда автомобильдердің үлкен ағынымен байланысты проблеманы шешу үшін қалаға кіретін магистральдардың санын көбейту қажет. Бұл туралы Алматы әкімі Ерболат Досаев ОКҚ брифингінде журналистердің сұрақтарына орай берген жауабында айтты.
Бүгінде 2 көшеде – Рысқұлов даңғылы мен Саин көшелерін БАКАД-қа дейін тесу жұмыстары жүргізіліп жатыр. Сонымен қатар БАКАД-қа апаратын 3 радиалды жолды тесу бойынша ЖСҚ әзірленуде. Бұл Абай даңғылының, Северное айналма көшесі және Тілендиев көшесінің екінші бөлігі. Біз бұл жұмыстарды 2027 жылға дейін кезең-кезеңімен аяқтауды жоспарлап отырмыз.
Шаһар басшысының айтуынша, қолданыстағы қалаға кіретін ірі магистральдардың өткізу қабілетін арттыру мақсатында Құлжа трактісін Рысқұлов даңғылынан Бұқтырма көшесіне дейін алты жолаққа дейін кеңейтуге ЖСҚ әзірлеу басталды.
Қазіргі таңда қала ішіндегі көлік жүктемесін азайту үшін Төле би көшесін (Яссауи көшесінен қала шекарасына дейін) тесу жұмыстары жүргізілуде. 2024 жылы Қажымұқан көшесін (Сейфуллин даңғылынан Жамақаев көшесіне дейін) және Жұбанов көшесін (Момышұлы көшесінен қала шекарасына дейін) тесу жұмыстарын бастау жоспарлануда, Мұқанов көшесін (Райымбек даңғылынан Мұқанов көшесіне дейін) тесуге ЖСҚ әзірленуде. Жұмыстарды 2027 жылға дейін аяқтау жоспарлануда.
Шаһар басшысы өзінің тапсырмасы бойынша жол қозғалысын басқарудың автоматтандырылған жүйесін енгізу бойынша жұмыстар жүргізіліп жатқанын хабарлады. Бұған қаладағы қалған 498 бағдаршам да кіреді.
«2021 жылдың қыркүйегінде біз жаңғыртудың бірінші кезеңі бойынша жұмыстарды аяқтадық. Бүгінде 591 нысанның 93-і автоматты режимде жұмыс істейді. Жалпы, жұмыстар 2025 жылға дейін толық аяқталады деп жоспарланып отыр. Автоматтандырылған жүйе көшелердің өткізу қабілетін арттыруға мүмкіндік береді», - деп түйіндеді қала әкімі.
Ақпарат көзі: Алматы қаласы әкімдігінің баспасөз қызметі
